4 Day Week Campaign ТББ-ын мэдээлснээр, Их Британид ойролцоогоор 200 орчим байгууллага болон бизнесүүд ажлын дөрвөн өдөрт бүр мөсөн шилжсэн бөгөөд энэ чиг хандлага олон оронд цаашид ч үргэлжлэх төлөвтэй байна.
Өнгөрсөн сард Телеграф сонинд Их Британийн дэд ерөнхий сайд Анжела Рейнерийн албан хаагчид ажлын өдрийг богиносгохыг шаардсан талаар мэдээлж, олны анхаарлыг татсан. Хэрэв төрийн удирдлагууд хүртэл энэ өөрчлөлтийг авч үзэж байгаа бол ойрын ирээдүйд олон байгууллага, хүний нөөцийн багууд ажлын дөрвөн өдрийг хэрэгжүүлэх асуудлыг хэлэлцэх нь дамжиггүй.
Их Британийн Peak PEO компани нэг жилийн өмнөөс илүү цаггүй, цалингаас хасалгүйгээр ажлын дөрвөн өдөрт шилжсэн бөгөөд хэрэгжүүлж эхэлснээс маш богино хугацаанд ажилчдын бүтээмж, оролцоо, сэтгэл ханамж мэдэгдэхүйц өсжээ. Энэхүү шилжилт нь ажилчдын ажилдаа дуртай байх, байгууллагын үр ашигт эерэг нөлөө үзүүлдэг нь нэгэнт тодорхой болсон. Гэхдээ олон жилийн турш ажлын таван өдрөөр ажиллаж ирсэн байгууллагуудын хувьд энэ өөрчлөлт нь амаргүй гэдэг нь тодорхой.
Хэрэв танай байгууллага ажлын дөрвөн өдөртэй болж, амжилттай хэрэгжүүлэхийг хүсэж байвал дараах зөвлөмжийг дагаарай.
- Жинхэнэ ажлын дөрвөн өдрийг бий болгох
Юуны түрүүнд, долоо хоногт дөрвөн өдөр ажиллана гэдэг нь ажилчид долоо хоногийн нийт ажлын цагийг дөрвөн өдөрт шахаж ажиллахыг хэлэхгүй. Харин илүү цаггүйгээр, цалин бууруулахгүйгээр ажлын нэг өдрийг хасах тухай ойлголт юм.
Ажлын цагийг шахаж ажиллуулах нь ажилчдад ачаалал үүсгэж, ажлын үр дүн, сэтгэл ханамжид сөргөөр нөлөөлнө. Харин жинхэнэ долоо хоногт дөрвөн өдөр ажиллаж эхэлснээр ажилчид илүү сэргэг, бүтээлч, үр дүнтэй ажиллах боломжтой болно.
- Алхам алхмаар хэрэгжүүлэх
Peak PEO нь 2023 онд ажлын дөрвөн өдөртэй болохдоо “Ultra-Flexible Fridays” буюу “Супер уян хатан Баасан гараг” санаачилгыг эхлүүлж, ажилчид Баасан гарагт заавал ажиллах шаардлагагүй болж, хүсвэл ажлаа үргэлжлүүлэх эсвэл өөртөө цаг гаргах сонголттой болсон.
Энэ туршилт тодорхой хэмжээнд үр дүнтэй байсан ч зарим ажилчид, ялангуяа ахлах түвшний менежерүүд Баасан гарагт мэйлээ шалгаж, ажлаа хийсээр байв.
Энэ нь бидний хүссэн үр дүнд бүрэн хүргээгүй ч ажилчдыг ажлын дөрвөн өдөрт аажмаар дасгах “дамжин өнгөрөх шат” болж чадсан. Тиймээс танай байгууллага ч мөн адил эхлээд туршилтын хувилбарыг хэрэгжүүлж, ажилтнуудын хандлагыг анзаарах нь зүйтэй.
- Ажилчид амралтын нэг өдөртөө үнэхээр амарч чадаж байна уу эсвэл ажиллаад байна уу?
- Хэрэв ажиллаж байгаа бол ямар шалтгаан байна вэ?
- Шийдвэрлэх шаардлагатай асуудал бий юу?
Эдгээр асуултад хариулж, зохих арга хэмжээг авснаар шилжилтийг илүү хялбар болгох боломжтой.
- Удирдлагууд санаачлан, тууштай байх хэрэгтэй
Уг санаачилга зөвхөн хүний нөөцийн бодлого төдийгүй байгууллагын соёлд чухал нөлөө үзүүлнэ. Энэ өөрчлөлт амжилттай хэрэгжихийн тулд удирдлагууд бүрэн дэмжих ёстой.
Анх хэрэгжүүлж эхлэхэд бүх давуу тал нь тэр дороо мэдрэгдэхгүй байж болох ч, тэвчээртэй байж, бодлогоор үргэлжлүүлэх нь чухал. Peak PEO компанид ажлын шинэ горим тогтворжсоны дараа зарим ажилчид амралтын өдрөө сайн дурын ажил хийхэд зориулж, тэдний өөртөө итгэх итгэл, сэтгэл зүй, амьдралын чанар нь сайжирч байгаа нь анзаарагджээ.
- Багийг хувааж, ажлын хуваарийг оновчтой зохион байгуул
Байгууллага бүр нэгэн зэрэг бүх ажилчдаа амраах боломжгүй байдаг. Жишээлбэл, аливаа яаралтай асуудал гарвал хэн хариу өгөх вэ? Үйлчлүүлэгчдийн асуулт, утсанд хэн хариулах вэ?
Үүнийг шийдвэрлэхийн тулд ажилчдаа хоёр болон түүнээс дээш бүлэгт хувааж, ээлжлэн амраах арга ашиглах нь зүйтэй. Peak PEO-н хувьд ажилчдын нэг хэсэг нь Даваа гарагт, нөгөө хэсэг нь Баасан гарагт амарч, сэлгэн ажилладаг.
Мөн ажлын өдрүүдийг үр бүтээлтэй ашиглахын тулд ажлын горимыг дараах байдлаар оновчтой зохион байгуулж болно:
- Гүн төвлөрөх өдөр – Шийдэмгий ажиллах, ганцаарчилсан гүйцэтгэл
- Гол уулзалт, хамтын ажиллагааны өдөр – Багийн ажил, чухал хуралдаан
- Амралтын өдрүүд
Ингэснээр ажлын өдрүүд үр дүнтэй болж, ажилчид илүү ухаалаг төлөвлөлт хийх дадалтай болно.
- Харилцаа холбоо хамгийн чухал
Долоо хоногт дөрвөн өдөр ажиллахыг үр дүнтэй хэрэгжүүлэхийн тулд байгууллагын дотоод харилцаа маш чухал.
- Ажилчдад өөрчлөлтийн талаар ойлгомжтой мэдээлэл өгөх
- Хурал, мэйл, асуулт-хариултын уулзалт зохион байгуулах
- Ажилчдаас санал, санаачилга авах боломж бүрдүүлэх
Мөн хэрэгжүүлсний дараа тогтвортой үргэлжлүүлэхийн тулд ажлын горим, зохион байгуулалт, үр нөлөөг тогтмол хянаж, шаардлагатай тохиолдолд сайжруулалт хийх хэрэгтэй.
Дүгнэлт
Ажлын дөрвөн өдөртэй байх нь зөв зохион байгуулалттай байвал ажилчдын бүтээмжийг нэмэгдүүлж, байгууллагын өсөлтийг дэмжих шилдэг арга хэмжээ болж чадна.
Хамгийн гол нь жинхэнэ дөрвөн өдрийн горимыг бий болгож, эхний үед туршилтын байдлаар хэрэгжүүлж, удирдлагууд санаачлан, харилцаа холбоог сайжруулж, багийн ажлын зохион байгуулалтыг ухаалаг хийх нь чухал.
Энэ бүхэн нь эцсийн дүндээ ажилчдын амьдралын чанарыг сайжруулж, байгууллагын тогтвортой хөгжилд хувь нэмэр оруулах болно.