Z үе буюу 1997-2012 оны хооронд төрсөн залуус хөдөлмөрийн зах зээлд ихээр нэмэгдэж байгаа ч ажлын байрандаа дасан зохицох нь тэдний хувьд тийм ч амаргүй байна. Тэдний ажил, амьдралын талаарх хүлээлт нь өмнөх үеийнхнээс өөр бөгөөд цар тахлын үед хөдөлмөрийн зах зээлд орж ирсэн нь тэдэнд улам хүндрэл учруулжээ.

Z үе өөрчлөлт, тодорхойгүй байдлын дунд өссөн гэж HiBob компанийн хүний нөөцийн газрын дарга Нирит Пелед-Мунц хэлсэн бөгөөд сүүлийн таван жилийн туршид тасралтгүй өөрчлөлт, улс төрийн хурцадмал байдал, COVID-19 цар тахал зэрэг хүчин зүйлс Z үеийнхнийг ихээхэн сорьсон. Мөн тэд цар тахлын үеэр ажлын байрандаа орсон учраас хамт олонтойгоо биечлэн харилцах, ур чадвараа хөгжүүлэх боломж хомс байсан гэдгийг онцолжээ.

Тэгвэл ажил олгогчид болон хүний нөөцийн мэргэжилтнүүд Z үеийнхнийг ажлын байранд илүү сайн зохицоход хэрхэн туслах вэ?

Тэдний эрхэмлэдэг зүйлийг ойлгох нь

Тэд ажил мэргэжлээ зүгээр нэг амьжиргааны эх үүсвэр гэж харахаас илүүтэйгээр утга учиртай, зорилготой байхыг хүсдэг. Deloitte-ийн 2024 оны судалгаагаар тэдний 86% нь ажилдаа утга учир, зорилго олох нь ажлын сэтгэл ханамж, сайн сайхан байдлынх нь чухал хэсэг гэж үзсэн байна.

Мөн тус судалгаанд оролцсон Z болон Миллениал үеийнхний 75% нь ажил олгогчийнхоо нийгэмд үзүүлж буй эерэг нөлөөллийг ажилд орох шийдвэр гаргахад чухал хүчин зүйл гэж үздэг аж.

Түүнчлэн байгаль орчны тогтвортой байдал Z үеийнхний хувьд томоохон асуудал болж байна. Судалгаанд оролцогчдын 62% нь сүүлийн сард уур амьсгалын өөрчлөлтийн талаар санаа зовниж байсан гэж хариулжээ. Үүнээс гадна, тэдний 20% нь ажил эсвэл ажилладаг салбараа солих шийдвэрийг байгаль дэлхийдээ санаа зовнидог үнэт зүйлстэйгээ нийцүүлэхийн тулд гаргасан гэсэн бол 25% нь үүнтэй холбоотой өөрчлөлт хийхээр төлөвлөж байна хэмээжээ.

Ажилчдыг ажлын байрандаа тогтвортой ажиллахад нь туслахын тулд хүний нөөцийн менежерүүд тэдэнд байгууллагынхаа нэг хэсэг гэх мэдрэмж төрүүлэх, ажлынх нь үнэ цэнийг тодорхой ойлгуулах хэрэгтэй.

Үүний нэг арга нь компанийн хүрээнд сайн дурын ажил зохион байгуулах, нийгэмдээ эерэг нөлөө үзүүлэх боломж олгох явдал юм. “Энэ нь тэдэнд өөрсдийгөө чухал хүн мэтээр мэдрэхэд тусалдаг бөгөөд ингэснээр тэд бусдыг дэмжих боломжтой болдог” гэж Пелед-Мунц онцолсон байна. Ийм боломжууд нь байгууллагынхаа нэг хэсэг гэх мэдрэмжийг нэмэгдүүлж, сэтгэл ханамжийг сайжруулдаг байна.

Ажилд орох үйл явцад нь хөнгөн хийсвэр бүү ханд

Z үеийнхнийг ажлын байранд илүү хурдан дасан зохицоход туслахын тулд тэдний ажилд орох үйл явцыг сайтар төлөвлөх нь чухал. Betterworks компанийн Гүйцэтгэх захирал Даг Деннерлайн “Ажилтныг бүрэн бэлтгэх үйл явц дор хаяж 12-18 сарын хугацаанд үргэлжлэх ёстой. 12 сарын дараагаас компани тухайн ажилтанд оруулсан хөрөнгө оруулалтаа нөхөж эхэлдэг. Харин 18 сарын дараа компанид бодит үр өгөөжөө өгч эхэлнэ” гэжээ.

Онолын мэдлэгээс гадна ажлын байранд илүү туршлагатай ажилчидтай хамтран ажиллаж, ажлыг өөрөө хариуцан хийхийн өмнө дадлагажих, харилцааны болон ерөнхий ур чадвараа хөгжүүлэх сургалтыг хангалттай авах нь чухал. Пелед-Мунцын хэлснээр, “Зөв зохион байгуулалттай, цогц сургалтын үйл явц” нь ажилчдыг тухайн ажлын байрны орчинд амжилттай шилжихэд тусалдаг байна.

Өмнөх үеийнхэн ажилд ороход “чи шатлалын хамгийн доод түвшнээс эхэлж байна” гэдгийг хүлээн зөвшөөрөх хандлагатай байсан бол харин Z үеийнхэн ажлын байрныхаа ач холбогдлыг ойлгоход илүү чиглүүлэг шаарддаг тул ажил олгогчид тэдний гүйцэтгэж буй үүрэг байгууллагын хувьд ямар үнэ цэнтэйг нь тайлбарлах хэрэгтэй хэмээн тэрээр онцолсон.

Z ажилчдын хэрэгцээг тодорхойлохын тулд тэднийг байнга судал

Z ажилчдын ажлын байран дахь мэдрэмжийг ойлгож, хэрэгцээг нь тодорхойлохын тулд хүний нөөцийн мэргэжилтнүүд тэднээс тогтмол судалгаа авах хэрэгтэй гэж Деннерлайн зөвлөсөн.

Эдгээр судалгаа нь зөвхөн Z ажилчдад дэмжлэг хэрэгтэй байгаа эсэхийг тодорхойлоод зогсохгүй менежерүүдийн залуу ажилчдад хандах хандлагад далд ялгаварлал байгаа эсэхийг ч илрүүлэх ач холбогдолтой.

Судалгааны үр дүнгээр “Менежерүүд ажилчидтайгаа харилцахдаа зөв үг хэллэг ашиглаж байна уу? Ажилчид өөрсдийгөө нээлттэй илэрхийлж, тусламж хүсэж чадаж байна уу?” гэдгийг тодорхойлох боломжтой гэж Деннерлайн хэлжээ.

Z үеийн ажилчдын хувьд сэтгэл зүйн эрүүл мэндэд чиглэсэн дэмжлэг чухал байр суурь эзэлдэг бөгөөд заримдаа ажлын бус шалтгаанаас болж стрессдэх тохиолдол ч бий. Пелед-Мунцын хэлснээр, тэд ажлын болон амьдралынхаа тэнцвэрийг хадгалж, сэтгэл зүйн асуудал гарвал дэмжлэг авах боломжтой байхыг хүсдэг. Тэд биднээс үүнийг анхаараасай гэж хүлээж байдаг байна.