Танай байгууллагын ажилчид сүүлийн үед ихээр өвдөж, ажлаас чөлөө авах нь ихэссэн мэт санагдаж байж магадгүй. Америкийн Анагаахын Холбоо (AMA)-ны мэдээлснээр, АНУ сүүлийн 15 жилийн хамгийн хүнд томуугийн улирал тохиож байна. Өвчний Хяналт, Урьдчилан Сэргийлэх Төв (CDC)-өөс мэдээлснээр он гарснаас нийтдээ 37 сая хүн томуугаар өвчилж, 480,000 хүн эмнэлэгт хүргэгдэж, 21,000 хүн нас баржээ.

Энэ жилийн томуугийн өндөр тархалт нь хэд хэдэн хүчин зүйлтэй холбоотой гэж дотор анагаах ухааны эмч, доктор Раж Сингх, M.D., FACP, FASN тайлбарлажээ.

“Нэгдүгээрт, ердийнхөөс илүү хүйтэн өвөл хүмүүсийг илүү дотор цагийг өнгөрөөхөд хүргэж, хүмүүстэй ойроос харилцах харилцаа нэмэгдсэн нь вирус дамжих боломжийг өсгөсөн. Хоёрдугаарт, COVID-19-ийн вакцины кампанит ажлын дараа вакцинаас халшрах нөхцөл үүсэн томуугийн вакцинжуулалтын түвшин мэдэгдэхүйц буурсан” гэж Лас Вегас хотын эмч онцоллоо.

Томуугийн дэгдэлт ажлын байранд ихээхэн нөлөөлдөг. Ажилчдын өвчлөл, ажлын тасалдал нь байгууллагуудын бүтээмжийг бууруулдаг тул ажил олгогчид өвчнөөс урьдчилан сэргийлэх үр дүнтэй стратеги хэрэгжүүлэх шаардлагатай.

Яагаад ажил олгогчид үүнд анхаарах хэрэгтэй вэ?

Халдварт өвчин нь зөвхөн ажилчдын эрүүл мэнд бус, байгууллагын тогтвортой ажиллагаанд ч хохиролтой байдаг. Ажилчид олноороо ажилдаа ирэхгүй үед ажлын ачаалал нэмэгдэж, багийн бүтээмж буурдаг.

Мөн энэ нь ажилчдад сэтгэл зүйн хувьд дарамт учруулдаг буюу ханиад томуу тархах үед ажилчид өвдсөн ч ажлын үүргээ биелүүлэх, эсвэл өвчтэй гэр бүлийн гишүүнээ асрах зэрэг давхар хямралд ордог.

“Ажиллах хүчний хомсдолоос үүдэлтэй ажлын ачаалал нэмэгдэх үед ажилчид ядарч туйлдах магадлал өндөр байдаг. Өвдсөн эсвэл гэр бүлийн гишүүнээ асрахын тулд чөлөө авсан ажилтан ажилдаа буцаж ирэхдээ нөхөж хийх их ажилтай тулгарна, харин тэднийг орлож ажилласан хамтрагчид хэт ачааллаас болж өөрсдөө эрүүл мэнддээ анхаарах завгүй болдог” гэж SHRM-ийн бизнесийн судалгааны менежер, доктор Раган Декер хэлжээ.

Ажлын байран дахь эрүүл мэнд, таатай байдлыг дэмжих бодлого хангалтгүй байх нь ажилчдын сэтгэл ханамжийг бууруулдаг. SHRM-ийн 2024 оны “Дэлхийн ажлын байрны соёлын төлөв” судалгаагаар “хортой” ажлын байранд ажилладаг ажилчдын 47% нь байгууллагадаа үлдэх сонирхолгүй, идэвхтэй өөр ажлын байр хайж байдгийг тогтоожээ.

“Ажилчид өөрсдийн ажил олгогч нь тэдний эрүүл мэндэд хэрхэн анхаарч буйг үнэлж байна. Хэрэв байгууллага хангалттай дэмжлэг үзүүлдэггүй бол ажилчид сэтгэл дундуур болж, ажлаасаа гарах магадлал өндөр” гэж Декер онцолжээ.

Энэ нөхцөлд удирдах албан тушаалтнууд тодорхой ойлголттой, уян хатан, бусдыг гэх сэтгэлтэй байснаар ялгарч чадна. Үүний үр дүнд ажилчдын сэтгэл ханамж нэмэгдэж, тогтвор суурьшилтай ажиллах магадлал өснө.

Ажилчдаа хамгаалж, өвчнийг хязгаарлах нь

Харин ажил олгогчид өвчнийг зүгээр хараад суух шаардлагагүй. Тэд ажилчдын эрүүл мэндийг хамгаалах үр дүнтэй аргуудыг хэрэгжүүлж болно.

Өвчтэй үед ажлаас чөлөө авах бодлогыг чанд мөрдөх

Ажилчид бие нь тавгүй байвал, эсвэл өвчтэй хүнтэй хавьтсан байж болзошгүй гэж эмээж байвал гэртээ байх ёстой.

“SHRM-ийн нээлттэй чөлөөний бодлого нь ажилчдыг эрүүл мэндээ нэн тэргүүнд тавихад дэмжлэг үзүүлж, цалингаа алдахаас айхгүйгээр шаардлагатай хугацаагаар амрах боломж олгодог” гэж SHRM-ийн урамшууллын хэлтсийн ахлах Шери Мартел хэллээ.

Ажилчид өвдөх үедээ алдаа гаргаж буй мэт буруутгагдахгүй гэдгээ мэдвэл эрүүл мэнддээ илүү хариуцлагатай ханддаг. Үүний үр дүнд илүү эрүүл, тогтвортой ажиллах хүч бүрдэнэ.

Ариун цэврийн дэглэмийг сайжруулах

Ажлын байранд гар хүрэх шаардлагагүй төхөөрөмжүүд (хөдөлгөөн мэдрэгчтэй гар ариутгагч, автомат хаалга, мэдрэгчтэй угаалтуур гэх мэт) суурилуулснаар вирусийн тархалтыг бууруулж болно.

Мөн нийтлэг хэрэглэгддэг эд зүйлсийг (гар утас, гар утасны дэлгэц, ширээний утас, компьютерын гар) ариутгах хэрэгсэл бэлэн байлгах нь чухал.

“Гараа тогтмол угааж, ажлын орчныг ариутгах нь вирусийн тархалтыг тасалдуулж, томуугаас урьдчилан сэргийлэх гол арга замуудын нэг юм” гэж доктор Сингх зөвлөв.

Уян хатан ажлын загвар хэрэгжүүлэх

Ажилчдад өвчтэй гэр бүлийн гишүүдээ асрах, эмчийн үзлэгт орох, шаардлагатай үед гэрээсээ ажиллах боломж олговол ажлын бүтээмж хадгалагдахын зэрэгцээ ажилчдын эрүүл мэндэд эергээр нөлөөлнө.

“Ажилчдадаа ажлын цагт уян хатан байх боломж олгох нь тэдний эрүүл мэндийг дэмжиж, ажил олгогчтойгоо илүү итгэлцэлтэй харилцахад тусалдаг” гэж доктор Сингх тайлбарлажээ.

Өвчнөөс сэргийлэх, уян хатан ажлын горим санал болгох, эрүүл ахуйг сайжруулах зэрэг бодлогыг хэрэгжүүлснээр байгууллагууд ажилчдын эрүүл мэндийг хамгаалахын зэрэгцээ ажлын бүтээмжээ хадгалах боломжтой.

Тохиромжтой арга хэмжээ авснаар томуугийн тархалтыг бууруулахын зэрэгцээ илүү үнэнч, тогтвортой баг бүрдүүлэх боломжтой юм.