Дэлхий даяар томоохон компаниудын удирдлагын түвшинд эмэгтэйчүүд одоо ч цөөнх байгаа бөгөөд хамгийн нөлөө бүхий албан тушаал болох Гүйцэтгэх захирал (CEO), Санхүү хариуцсан захирал (CFO) зэрэг албан тушаалын ердөө 10%-ийг эмэгтэйчүүд эзэлж байна. Сүүлийн жилүүдэд эмэгтэйчүүдийн дэлхийн хөдөлмөрийн зах зээл дэх оролцоо цар тахлын өмнөх түвшнээс нэмэгдсэн боловч энэ өсөлтийн хурдыг харгалзан үзвэл удирдлагын түвшинд эрэгтэйчүүдтэй зэрэгцэн, тэнцүү болох хүртэл 134 жил шаардагдана гэж JPMorgan Chase судалгаандаа дурджээ.
АНУ-д өнгөрсөн онд эрэгтэйчүүд нэг доллар олох тутамд ажил эрхэлсэн эмэгтэйчүүд дөнгөж 83 центийг л олсон байна. Гэсэн хэдий ч эмэгтэйчүүд орон сууц худалдаж авах тал дээр эрчүүдээс хоёр дахин өндөр хувьтай байгаа гэж тус банк Payscale-ийн мэдээллийг иш татан онцолжээ.
“Цалин хөлсний тогтмол ялгаа нь өнөөг хүртэл оршсоор буй системийн тэгш бус байдлын тод илрэл бөгөөд цалингийн тэгш байдалд зайлшгүй анхаарах шаардлагатайг сануулж байна” гэж JPMorgan Chase мэдэгдэв.
Standard & Poor’s 500 компанийн удирдах зөвлөлийн эмэгтэй гишүүдийн хувь өнгөрсөн онд дээд үзүүлэлт болох 34%-д хүрсэн ч, ерөнхий байдлаар сүүлийн жилүүдэд АНУ-ын удирдах түвшинд эмэгтэйчүүдийн оролцоо саарч буйг JPMorgan Chase мэдээлэв.
Жишээлбэл, Standard & Poor’s 100 компанийн удирдлагын түвшинд эмэгтэйчүүдийн эзлэх хувь 2022 онд 12.2% байсан бол 2023 онд 11.8% болж буурсан байна.
146 улсыг хамруулсан судалгаагаар 2024 оны байдлаар хүйсийн тэгш байдлын зөрүү 68.5% хэвээр бөгөөд энэ нь эмэгтэйчүүдийн улс төр, эдийн засгийн оролцоо, эрүүл мэнд болон боловсролын түвшнийг эрчүүдтэй харьцуулсан үзүүлэлт гэж JPMorgan Chase дурджээ.
НҮБ-ын тооцоолсноор хэрэв 2030 он гэхэд хүйсийн тэгш байдлыг тогтоох гэвэл жил бүр 360 тэрбум ам.долларын хөрөнгө оруулалт шаардлагатай болох аж.
Харин одоогийн чиг хандлага хэвээр үргэлжилбэл дэлхий дахинд эмэгтэйчүүд ирэх зуун хүртэл тэгш эрхтэй болохгүй бөгөөд энэ нь өнөөдөр төрж буй охин хүүхэд өөрийн 97 насныхаа төрсөн өдрийг тэмдэглэх хүртэл буюу дэлхийн бүх улс оронд хүлээн зөвшөөрөгдсөн дундаж наслалтын түвшнээс давсан хугацаанд хүлээх хэрэгтэй гэсэн үг гэж тус банк дүгнэжээ.
Гэсэн хэдий ч зарим эерэг өөрчлөлтүүд ажиглагдаж байна. АНУ-д эмэгтэйчүүдийн ажиллах хүчний тоо түүхэн дээд түвшинд хүрсэн гэжээ. Мөн эмэгтэйчүүд орон сууц эзэмших тал дээр “нэлээд ахиц гаргаж” байгаа бөгөөд ганц бие эмэгтэйчүүд ганц бие эрчүүдээс хоёр дахин хурдан амьдрах сууцаа худалдан авч байгаа хэдий ч зээлийн хүсэлтдээ татгалзсан хариу авах магадлал өндөр хэвээр байгааг тус банк тэмдэглэв.
Bank of America Securities-ийн судалгаагаар ирэх арван жилд эмэгтэйчүүд хувьцаа эзэмшигчийн хувьд илүү их нөлөөтэй болох боломжтойг харуулж байна.
АНУ-ын 1946–1964 онд төрсөн эрчүүд 2035 он гэхэд эхнэр, хүүхдүүддээ нийт 30 их наяд ам.долларын хөрөнгө өвлүүлэх тооцоог Америкийн Төв Банкнаас гаргажээ.
“Энэхүү хөрөнгө өвлөгдөж эхэлсэн бөгөөд ингэснээр удахгүй эмэгтэйчүүд урьд өмнөхөөсөө илүү их санхүүгийн эрх мэдэлтэй болох юм” гэж тус банк онцолжээ.