Дэлхий дахиныг цар тахал нөмөрснөөс хойш ердөө дөрвөн жил өнгөрчээ. 2020 онд ажилгүйдэл түүхэнд байгаагүйгээр дээд цэгтээ хүрч, зарим бизнес аргагүйн эрхэнд хаалгаа барьж, зарим нь үйл ажиллагаагаа огцом өөрчлөхөд хүрсэн билээ.

Түүнээс хойш өнөөг хүрэхэд олон ажилтан эргэн ажилдаа орсон ч бүгд арай биш. Зарим нь ажил завсардсан хугацаагаа ашиглан сургуульд сурч, шинийг эзэмшиж, аялж, гэр бүлээ өргөжүүлсэн байна. Гэхдээ ингэж завсардсаны дараа ажилдаа эргэн орох хүн бүрд хялбар биш ээ. Иймд ажилдаа эргэн орохоос өмнө дөрвөн үнэнийг дахин нэг санах хэрэгтэй шүү.

Ажлаас завсарлага авлаа гээд төсөөрч, зэврээгүй, харин ч сайжирсан

Шилдэг удирдагч, манлайлагч нар олон хүнтэй танилцаж, олон газар үзэж, юм юм хийж явсан байдаг. Ажлын туршлага мэдээж чухал ч ердөө нэг ажлын туршлага хангалтгүй. Дан ганц ажлын туршлагатай бол янз бүрийн нөхцөл байдалд ямар ямар өөр арга барилаар хандах талаар мэдлэггүй байна гэсэн үг. Эцэстээ хайрцгаасаа гарч сэтгэж чадахаа больчихдог.

Харин ажил завсардсан үед бид өмнө хэзээ ч үзээгүй зүйлээ хийж үзэх нь олон. Урьд нь цаг зав олддоггүй байсан юмаа турших сайхан боломж гардаг. Улмаар харах өнцөг өөрчлөгдөж, хөгждөг. Ийм ажил завсардлаа гээд та сайжирч, хөгжсөн болохоос ухарч муудсан зүйл байдаггүй.

Ажил завсардсан хүн ганц та биш

Хүн бүр л амьдралынхаа аль нэг үед ажлаа орхиж, өөр юм хийж, зарим нь буцаад ирдэг. Энэ бол хэвийн л зүйл, та ганцаараа биш. Ажилд орохоор бэлдэж байгаа байгууллагын чинь дарга ч гэсэн өөрөө ийм юм үзэж туулсан л байгаа. Ажилгүй удах нь муу, бүтэхгүй юм гэдэг явцуу ойлголтод бүү итгээрэй.

Танилцуулга дээрээ хэсэг ажил завсардсан гэж бичлээ гээд муухай харагдахгүй. Харин ч тух цаг хугацаандаа шинэ юм сурч, хөгжиж, өөртөө анхаарсан бол харин ч сайн. Хэрэв яг одоо та ажлаа орхиод, ямар нэг юм хийгээгүй байгаа бол одоо ч оройтоогүй гэдгийг санаарай. Ном уншиж, клубт нэгдэж, хичээлд сууж, өсөж, хөгжиж болно шүү дээ. эргээд ажилд орохдоо хамт олондоо ярих юмтай болоорой.

Нэг шөнө, эсвэл нэг жилийн дотор авьяас чадвар унтарчихгүй ээ

Ажилгүй удлаа гээд юу мэддэг, чаддаг чинь огт өөрчлөгдөхгүй. Нэг алхам ухраад, амьдралынхаа өөр хэсгүүдэд анхаарал хандуулсан байлаа гээд мэргэжлийн ур чадвар, ажлын туршлага хорогдчихгүй. Диплом, сертификат, үнэмлэх байж л байдаг шиг туршлага ч гэсэн таныг орхиод одчихно гэж санаа зоволтгүй. Нэгэнт сурсан чадвар сэргэхдээ итгэмээргүй амархан байдаг шүү дээ.

Ажлаа орхино гэдэг бол таны амьдралын хувьд зөв шийдвэр байсныг зөв хүн нь зөв ойлгоно

Ажлаа орхичихсон хүнийг муу хэлнэ дээ гэж айж байна уу? Мэдээж зарим хүмүүс яг тэгнэ. Гэхдээ тэглээ гээд яах вэ дээ. ажлаасаа завсарлага авч аялж, хүүхдээ өсгөж, шинийг сурсан явдлыг чинь тохуурхан шүүмжилж байгаа ажил олгогч бол танд тохирсон хүн биш ээ. Хэрэв тэгж харж байгаа бол тэр хүн таныг хүндлэхгүй, хүн гэж хүлээж авахгүй байна гэсэн үг.

Сайн байгууллага, сайн ажил олгогч нар хүнээ ажлын морь биш, хүн гэж хүлээж авдаг. Одоо ажиллаж байгаа газрын чинь дарга ийм асуудал ойлгохгүй байвал таныг хүн гэж үздэггүй гэсэн үг. Таны сонголт бол зөв. Зөв хүн нь зөвөөр ойлгож л таарна.