Ажлаас гарна гэдэг бол том, чухал шийдвэр. Заримдаа үнэхээр хийж байгаагаа болих, өөр ажил олох шаардлагатай болсон нь илт мэдэгддэг ч, заримдаа бол үгүй, шийдэхэд бэрх байдаг. Дараагийн ажлаа олсон эсэх, энэ ажилдаа хэр удаж байгаа гэх мэт шийдвэрт янз бүрээр нөлөөлөх хүчин зүйлс бас бий. Гэхдээ юу ч гэж шийдсэн бай эргээд харилцах нүүртэй үлдсэн нь хэзээд зөв.

Дэлхий бөөрөнхий, хөдөлмөрийн зах зээл бүүр ч бөөрөнхий. Ажилладаг салбар, хот гээд бүх юмаа бүрэн өөрчилж, төрөл арилжих гээгүй л бол хуучин хамт олонтойгоо дахин тааралдах бол гарцаагүй. Тиймээс ажлаас гарч байгаа гээд хэнтэй ч харилцаагаа бүрэн тасалчхаж болохгүй.

Хамгийн түрүүнд шууд удирдлагатайгаа ярилцаарай. Тэгэхдээ өөрөө хүсэхгүй бол яагаад ажлаас гарах гэж байгаа, гараад юу хийх гэж байгаа талаараа дэлгэрэнгүй ярих шаардлагагүй. Гэхдээ ерөнхий юмаа заавал яриарай. Бас боломж гарвал энэ ажлаасаа хэчнээн ихийг сурсан, хамт ажиллахад таатай байсан гэх зэргээр сайхан яриа өрнүүлээрэй.

Дараагийн алхам бол албан ёсны халагдах өргөдлөө хүний нөөцийн мэргэжилтэнд бичиж өгөх. Хэдий тухайн байгууллагаас гарахад заавал халагдах өргөдөл бичих шаардлагагүй байлаа ч өргөдөл бичсэнээр ажлаас гарах өдөр гэх зэргийг тодорхой болгох үр дүнтэй. Нэгэнт удирдлага, хүний нөөцдөө мэдэгдсэн бол хамт олондоо хэрхэн хэлэх нь таны мэдэх хэрэг.

Хэрэв та өөрөө менежер бол хүний нөөцийн мэргэжилтний дараа шууд хандах хүмүүс бол таны удирдлагад байдаг ажилтнууд юм. Тэгэхдээ таны дараа хэн орлож ажиллах талаар тодорхой ойлголт өгвөл тун сайн.

Дараагийн, бас хамгийн чухал алхам бол ажлаас гартлаа идэвхээ алдахгүй ажиллах. Мөн хариуцлага, нарийн бичиг баримт, мэдээлэл, харилцагчдын мэдээлэл гэх мэт хэрэгцээтэй бүгдийг хүлээлгэж өгөх, дамжуулах, жижиг төслүүдээ дуусгах юм.

Эцэст нь хэдий танай байгууллага албан ёсны үдэлтийн ярилцлага хийдэггүй байлаа ч үлдэж байгаа хамт олондоо үнэн, хэрэгцээтэй, хүндэтгэлтэй үг, сэтгэгдэл хэлж, цаашдын ажилд нь нэмэр болоорой.