Мэдээж хүн бүр төгс төгөлдөр биш шүү дээ, дарга нар ч ижил. Ялангуяа янз бүрийн нөхцөл байдалд, өөр өөр ажилтнуудтай харилцдаг учир дарга нар өөрөөсөө ч болоод, бусдаас ч болоод заримдаа төгс биш гэдгээ харуулчхаад байдаг. Нэг асуудлыг зөв шийдсэн арга өөр асуудалд таарахгүй байх нь олон шүү дээ.

Олон улсад хийсэн сүүлийн үеийн судалгаанаас үзвэл ажилтнуудын 99.6 хувь нь даргаа муу дарга хэмээн үздэг гэнэ. Математикч биш хүн ч энэ үзүүлэлтийг хараад бараг бүх хүн даргаа муу гэж үнэлдэг болохыг ойлгоно. Дарга бүр л ажил мэргэжлийнхээ аль нэг шатанд муу дарга байсан удаатай гэхэд хилсдэхгүй. Гэхдээ хэнийг ч муу дарга болгож харагдуулах ямар эрсдэлүүд байдгийг урьдаас мэдэж байвал зайлсхийхэд арай хялбар байх болно.

Цаг

Цаг бол алт гэдгийг бүгд мэднэ. Гэвч тэр алтыг хэрхэн зарцуулах вэ гэдэг бол ухаан. Тийм ч учраас цагаа зөв зохицуулж чаддаггүй дарга нар ажилтнууддаа тун ч муу нэртэй болчихдог. Угаас түүнд сайн дарга байх цаг байхгүй шүү дээ. жишээлбэл, ажилтнууддаа цаг гаргаж чаддаггүй, хурал зөвлөгөөндөө оролцдоггүй, хүмүүстээ хэрэгтэй тусламж үзүүлж амждаггүй дарга нарыг бүгд дуу нэгтэйгээр муу дарга гэж цоллоно. Гэтэл зарим дарга нар ажилтнуудтайгаа хамт байх шаардлагагүй, хамт байж, ярилцах нь тэднийг чухал ажлаас нь сатааруулна гэж эндүүрсэндээ энэ занганд хялбархан орчихдог.

Буруу ойлголт

Дараагийн нэгэн том занга бол ажилтнуудынхаа хэрэгцээ, шаардлага, хүсэл, сонирхлыг буруу ойлгох, улмаар улам муу дарга болох явдал. Жишээлбэл, зарим дарга нар ажилтнуудынхаа ажилд хэтэрхий их оролцож, туслах гэж оролдсоноор ажил цалгардуулж, хүмүүсийг залхааж гүйцдэг. Мэдээж хийж байгаа ажлаа мэддэг, сайн чаддаг, хэрэгтэй бүхнийг зөвлөдөг, заадаг, сургадаг, магтаж урамшуулж, хэрэгтэй үед шүүмжилж зэмлэдэг дарга байх гайхалтай сайхан. Ихэнх, ялангуяа шинэхэн дарга нар өөрсдийгөө яг ийм дарга болж байна гэж эндүү төсөөлдөг.

Гэвч бодит байдал дээр арай өөр. Бүх юманд оролцоод, хошуу, хуруу дүрээд байдаг дарга нар хамгийн ядаргаатай. Өөрөөр микроменежмент гэж нэрлэдэг энэ арга барил ихэнх тохиолдолд дарга нарыг маш муу дарга болгож харагдуулдаг. Судалгаанд оролцсон ажилтнуудын 80 хувь нь ийм даргын нүүр үзсэн гэнэ. Хэчнээн хүмүүсийнхээ төлөө, ажлынхаа төлөө гэж бодож байвч өөрөө бүгдэд оролцохын оронд ажилтнууддаа эрх чөлөө, цаг, сонголт, хариуцлага үүрүүлэх нь хамгийн үр дүнтэй арга шүү.

Чадвар

Ажилтнуудынхаа үргэлж хувирч, өөрчлөгдөж байдаг хэрэгцээ шаардлагыг гүйцээх чадваргүй дарга нарт дуртай хүн гэж юу байх вэ. Өмнө ямар нэг аргаар ажилтнуудынхаа асуудлыг бүрэн төгс шийдэж чадсан байлаа гээд тэр арга дахин дахин бүтнэ гэсэн үг биш гэдгийг ойлгоогүйгээсээ болж алдаж байгаа дарга нар бишгүй. Жишээлбэл, хуучны хатуу арга барилыг эзэмшсэн дарга нар орчин цагт ажилтнуудаа магтаж, сайшааж, үнэлж чаддаггүйгээс болж хүмүүс ажил дээрээ урам зориг, хичээл зүтгэлгүй болдог.